Al podarès vignî di cèdule, par talian “cedola", ma ancje “biliet di bancje" (NP), o di cìdule o ben “cighignole" o “rodele", o ancje “articolazion di braçs e gjambis". Olivieri 1923 al cjape in considerazion il venezian antîc ceda “cise".
La forme Cedolìn e je tipiche di Pielunc tal comun di Vît, dulà che e à dât il non al piçul borc dai Cedolìns (ancje in IGM); di chi la forme e je emigrade a Spilimberc, Udin e For Disore. La forme Cedolini, e je a Tumieç e a Davâr, salacor cu la stesse origjin.
fonts
1448, ai 7 di Avrîl m.° Giorgio pellicciaio q. Ant. Zudulini de Asio abit. S. Daniele (ANU 3874); 1544, ai 16 di Fevrâr Antonio Ser Cidulini q. Michel di Vito compra biade a credito a S. Daniel (ANU 3908); 1663 Domenico Cedolino de Asio (Corgnali); 1716 m.° Mattia Cedolin, medico di Vito (ASU CRS 844/1); 1791, ai 22 di Zenâr il Sig. Gio. Dom. q. Gio: Batta Migotto del Canale di Clauzetto fa donazione di tutta la sua facoltà a sua figlia Maria che sta per sposare Antonio Cedolino f. del Sig. Giac. q. Ant. Canale di Vito (ACR 451/fascicoletto); 1938 Cedolin 40 fameis a Pielunc e 7 a Vît (Corgnali).